കൊല്ലം: ബംഗലൂരുവില്‍ നിന്ന് ട്രെയിനില്‍ കടത്തിക്കൊണ്ടുവന്ന കഞ്ചാവുമായി യുവാവ് കൊല്ലം റെയില്‍വേ സ്റ്റേഷനില്‍ നിന്ന് പിടിയിലായി. അയത്തില്‍ പുന്തലത്താഴം സ്വദേശി സാരംഗ് ആണ് പിടിയിലായത്. കൊല്ലം ഈസ്റ്റ് പോലീസും ഡാന്‍സാഫ് ടീമും ചേര്‍ന്നാണ് പ്രതിയെ പിടികൂടിയത്. 4 കിലോ കഞ്ചാവ് ഇയാളില്‍ നിന്ന് പിടിച്ചെടുത്തു.
രണ്ട് കിലോവീതമുള്ള പൊതികളിലാണ് കഞ്ചാവ് സൂക്ഷിച്ചിരുന്നത്. മറ്റൊരാള്‍ക്ക് വേണ്ടി ഇടനിലക്കാരനായി പ്രവര്‍ത്തിക്കുകയായിരുന്നു സാരംഗ്. കഞ്ചാവ് മൈലാപ്പൂരിനടുത്ത് എത്തിക്കുവാന്‍ ആയിരുന്നു നിര്‍ദേശം. റെയില്‍വേ സ്റ്റേഷനില്‍ സാരംഗിനെ കൂട്ടിക്കൊണ്ടുപോകാന്‍ എത്തിയ യുവാവിനെയും പിടികൂടിയെങ്കിലും കുറ്റക്കാരന്‍ അല്ലെന്നുകണ്ട് വിട്ടയയ്ക്കുകയായിരുന്നു. നേരത്തെയും ഇത്തരത്തില്‍ കഞ്ചാവ് കൊണ്ടുവന്നിട്ടുള്ളതായി സാരംഗ് പോലീസിനോട് പറഞ്ഞു. എസിപിമാരായ ഷരീഫ്, നസീര്‍, എസ്‌ഐ സായിസേനന്‍ എന്നിവരുടെ നേതൃത്വത്തിലുള്ള ഡാന്‍സ് ടീമും ഈസ്റ്റ് പോലീസ് സ്റ്റേഷനിലെ എസ്‌ഐമാരായ സുമേഷ്, സവിരാജ് എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.