ന്യൂഡൽഹി: പരമ്പരാഗതമായ പേപ്പർ ചാർട്ടിനു പകരം ഇനിമുതൽ ടിടിഇമാരുുടെ കയ്യിൽ ഉണ്ടാകുക ടാബ്. ടിക്കറ്റ് ചാർട്ടിനുപകരം ഹാൻഡ് ഹെൽഡ് ടെർമിനൽ സംവിധാനം നിലവിൽ വന്നതോടെയാണ് ഈ സുപ്രധാന മാറ്റം വരുന്നത്.
ഇത്രകാലവും സീറ്റ് ഒഴിവുണ്ടോ എന്നത് അറിയണം എങ്കിൽ ടിക്കറ്റ് പരിശോധകർക്ക് അടുത്ത ചാർട്ടിങ് സ്റ്റേഷൻ വരെ കാത്തുനിൽക്കേണ്ടി വന്നിരുന്നു. എന്നാൽ എച്ച്‌.എച്ച്‌.ടി വരുന്നതോടെ ഇതിന് പരിഹാരമാകും. ഒഴിവുള്ള സീറ്റ് വിവരം ടാബിൽ രേഖപ്പെടുത്തും. ട്രെയിൻ പുറപ്പെട്ടാലും സീറ്റ് ഒഴിവുണ്ടെങ്കിൽ ടിക്കറ്റ് പരിശോധകർക്ക് അടുത്ത ചാർട്ടിങ് സ്റ്റേഷൻ വരെ ഇനി കാത്തു നിൽക്കേണ്ടി വരില്ല. ഒഴിവുള്ള സീറ്റുകൾ അപ്പോൾത്തന്നെ ആർഎസിയിലോ വെയിറ്റിംഗ് ലിസ്റ്റിലോ ഉള്ള യാത്രക്കാരന് നൽകാൻ സാധിക്കും.
ടിക്കറ്റിൽ രേഖപ്പെടുത്തിയ ബോർഡിംഗ് സ്റ്റേഷനിൽ നിന്നു തന്നെ കയറിയില്ലെങ്കിൽ ഇനിമുതൽ എട്ടിൻറെ പണിയാണ് യാത്രികരെ കാത്തിരിക്കുന്നത്. കാരണം ടിക്കറ്റിൽ രേഖപ്പെടുത്തിയ ബോർഡിങ് സ്റ്റേഷനിൽ നിന്ന് സീറ്റിൽ യാത്രികൻ എത്തിയില്ല എങ്കിൽ ടിക്കറ്റ് റദ്ദാകും. ഇത്രകാലവും മാനുഷിക പരിഗണന വച്ച്‌ റെയിൽവേയുടെ ടിക്കറ്റ് എക്സാമിനർമാർ ഇത്തരം യാത്രികർക്ക് നൽകിയിരുന്ന അവസരം ഇതോടെ ഇല്ലാതാകുകയാണ് എന്നാണ് പുതിയ റിപ്പോർട്ടുകൾ.
ചാർട്ട് പ്രകാരം ബർത്ത്/സീറ്റിൽ ആളെത്തിയില്ലെങ്കിൽ അടുത്ത സ്റ്റേഷൻ തൊട്ട് അത് റദ്ദാക്കണമെന്ന് തന്നെയാണ് നിയമം. എന്നാൽ മാനുഷിക പരിഗണന വച്ച്‌ ടിടിഇമാർ രണ്ടിലധികം സ്റ്റേഷൻവരെ കാത്തുനിൽക്കുക പതിവായിരുന്നു ഇത്ര കാലവും. എന്നാൽ ഈ പരിഗണന പുതിയ സാങ്കേതിക വിദ്യയായ ഹാൻഡ് ഹെൽഡ് ടെർമിനൽ സംവിധാനത്തിൽ കിട്ടില്ല. അതായത് ടിക്കറ്റിൽ രേഖപ്പെടുത്തിയ ബോർഡിംഗ് സ്റ്റേഷനിൽ നിന്നും യാത്രികൻ കയറി ഇല്ലാ എങ്കിൽ അടുത്ത സ്റ്റേഷൻ തൊട്ട് അർഹരായ ആർ.എ.സി./വെയിറ്റിങ് ലിസ്റ്റുകാർക്ക് ഓട്ടോമാറ്റിക്ക് ആയി ആ സീറ്റ് ലഭിക്കും.
ടിക്കറ്റ് എടുക്കുമ്പോൾത്തന്നെ കയറുന്ന സ്റ്റേഷൻ അഥവാ ബോർഡിങ് സ്റ്റേഷൻ രേഖപ്പെടുത്താം. ടിക്കറ്റ് എടുത്തതിനുശേഷം കയറുന്ന സ്ഥലം മാറ്റണമെന്ന് തോന്നിയാലും പിന്നീട് മാറ്റാനും സാധിക്കും. ട്രെയിൻ പുറപ്പെടുന്നതിന് നാലുമണിക്കൂർ മുമ്പ് ഇത് ചെയ്യണം എന്നു മാത്രം.കേരളത്തിൽ മാവേലി എക്സ്പ്രസ്, മലബാർ എക്സ്പ്രസ്, വഞ്ചിനാട് എക്സ്പ്രസ് ഉൾപ്പെടെ എല്ലാ പ്രധാന ട്രെയിനുകളിലും ടിക്കറ്റ് പരിശോധകരുടെ കൈയിൽ ചാർട്ടിനുപകരം ടാബ് വന്നുകഴിഞ്ഞു എന്നാണ് റിപ്പോർട്ടുകൾ.
അതേസമയം ഹാൻഡ് ഹെൽഡ് ടെർമിനൽ സംവിധാനത്തിൻറെ ചില ന്യൂനതകളും ചിലർ ചൂണ്ടിക്കാട്ടുന്നുണ്ട്. ബോർഡിങ് സ്റ്റേഷനിൽ നിന്ന് കയറാതെ റദ്ദാക്കപ്പെട്ട ആളുടെ ടിക്കറ്റ് മറ്റൊരു യാത്രക്കാരന് നൽകുമ്പോൾ നിലവിൽ മെസേജ് വരില്ല. പരിശോധകർ വിവരം യാത്രക്കാരനോട് പറയണം. ബോർഡിങ് സ്റ്റേഷൻ മാറി കയറുന്ന യാത്രികനെ ട്രയിനിൽ നിന്ന് ഇറക്കി വിടാതെ ഒഴിവുള്ള ഏതെങ്കിലും ബർത്ത് നൽകണം എന്ന നിർദേശവും ഉയരുന്നുണ്ട്.
