ഇറാൻ പിടിച്ചെടുത്ത ചരക്കു കപ്പൽ MSC എരീസിലെ 5 ഇന്ത്യക്കാരെ കൂടി മോചിപ്പിച്ചു. ഇറാനിലെ ഇന്ത്യൻ എംബസിയാണ്‌ ഇക്കാര്യം അറിയിച്ചത്.
5 പേരും ഇന്ന് വൈകുന്നേരം ഇറാനിൽ നിന്ന് പുറപ്പെട്ടുവെന്നും എംബസിയുടെ അറിയിപ്പിൽ പറയുന്നു.എംബസിയുമായും ബന്ദർ അബ്ബാസിലെ ഇന്ത്യൻ കോൺസുലേറ്റുമായുമുള്ള സഹകരണത്തിന് ഇറാന് ഇന്ത്യൻ എംബസി നന്ദി അറിയിച്ചു. കപ്പലിലെ ഏക വനിത ജീവനക്കാരി, ആൻ ടെസ്സ ജോസഫ് ഏപ്രിൽ 18 ന് മടങ്ങി എത്തിയിരുന്നു. അഞ്ചു ഇന്ത്യക്കാരോടൊപ്പം, ഒരു ഫിലിപ്പൈൻ സ്വദേശിയെയും, ഒരു എസ്റ്റോണിയ സ്വദേശിയെയും മോചിപ്പിച്ചിട്ടുണ്ട്. ഇറാൻ പിടിച്ചെടുത്ത ഇസ്രായേൽ ബന്ധമുള്ള കപ്പലിൽ ഉണ്ടായിരുന്ന 25 ജീവനക്കാരിൽ 17 പേർ ഇപ്പോഴും കപ്പലിൽ തന്നെ തുടരുകയാണ്. ഇതിൽ 11 പേർ ഇന്ത്യക്കാരാണ്. ഇവരുടെ മോചനവും എത്രയും വേഗം സാധ്യമാക്കാനുള്ള ഇടപെടൽ തുടരുന്നതായി വിദേശ കാര്യ മന്ത്രാലയ വൃത്തങ്ങൾ അറിയിച്ചു.
