ഉത്തരേന്ത്യയിൽ കടുത്ത ചൂട് തുടരുന്നു. ഉത്തര്‍പ്രദേശിലെ ആഗ്രയില്‍ താപനില 46.9 ഡിഗ്രിയും മധ്യപ്രദേശിലെ ഗോളിയോറില്‍ -44.9 ഡിഗ്രിയും രേഖപ്പെടുത്തി. ഡൽഹിയിലും പലയിടങ്ങളിലും 45 മേൽ താപനില എത്തിയിട്ടുണ്ട്. ചൂട് കൂടുതൽ ശക്തമായതോടെ വിവിധ ഇടങ്ങളിൽ വൈദ്യുതി ബന്ധത്തിലും ഇന്നലെ രാത്രിയിൽ തകരാറുകൾ ഉണ്ടായി. മണിക്കൂറുകളോളം വൈദ്യുതി ബന്ധം വിച്ഛേദിക്കപ്പെട്ടത് ജനങ്ങളുടെ വലിയ പ്രതിഷേധത്തിനാണ് വിവിധയിടങ്ങളിൽ കാരണമായത്. നിലവിൽ നടക്കുന്ന തെരഞ്ഞെടുപ്പ് പ്രചരണങ്ങളെയും കടുത്ത ചൂട് ബാധിച്ചിട്ടുണ്ട് . ഡല്‍ഹി കൂടാതെ പഞ്ചാബ്, ഹരിയാന രാജസ്ഥാന്‍ സംസ്ഥാനങ്ങളിലും റെഡ് അലര്‍ട്ട് പ്രഖ്യാപിച്ചു.ഉത്തര്‍പ്രദേശിലും ബീഹാറിലും ഓറഞ്ച് അലര്‍ട്ട് ആണ്. ബര്‍മറിലും കാണ്‍പൂരിലും രേഖപ്പെടുത്തിയ ഉയര്‍ന്ന താപനില 46.9 ഡിഗ്രി സെല്‍ഷ്യസ് ആണ്.
അടുത്ത നാല് ദിവസം കൂടി ഉത്തരേന്ത്യന്‍ സംസ്ഥാനങ്ങളില്‍ ഉഷ്ണതരംഗം ശക്തമാകുമെന്നാണ് കാലാവസ്ഥ നിരീക്ഷണകേന്ദ്രത്തിന്റെ മുന്നറിയിപ്പ്.
