ന്യൂഡെല്‍ഹി. നീറ്റ് പരീക്ഷ ക്രമക്കേട് സി.ബി.ഐ അന്വേഷിക്കണമെന്ന് ആവശ്യപ്പെട്ടുള്ള ഹർജിയിൽ എൻ.ടി.എ യക്ക് സുപ്രീംകോടതി നോട്ടീസ്.കൗൺസിലിങ് സ്റ്റേ ചെയ്യണമെന്ന ആവശ്യം സുപ്രീംകോടതി വിസമ്മതിച്ചു.നീറ്റ് പരീക്ഷ വീണ്ടും നടത്തണമെന്ന് ആവശ്യപ്പെട്ട് വിദ്യാർത്ഥികൾ കേന്ദ്ര വിദ്യാഭ്യാസ മന്ത്രിക്ക് നിവേദനം നൽകി.
നീറ്റ് പരീക്ഷ ക്രമക്കേടും ചോദ്യപേപ്പർ ചോർച്ചയും അന്വേഷിക്കണമെന്ന ഹർജികളിലാണ് സുപ്രീംകോടതി NTA യ്ക്കും കേന്ദ്രസർക്കാരിനും നോട്ടീസ് അയച്ചിരിക്കുന്നത്.രണ്ടാഴ്ചയ്ക്കകം മറുപടി നൽകണമെന്ന് ആവശ്യപ്പെട്ടു.പരീക്ഷാ ക്രമക്കേടുമായി ബന്ധപ്പെട്ട മറ്റു ഹർജികൾക്കൊപ്പം അടുത്തമാസം എട്ടിനാണ് കേസ് വീണ്ടും പരിഗണിക്കുക.കോട്ട കോച്ചിങ് സെന്‍ററിൽ വിദ്യാർഥികൾ ആത്മഹത്യ ചെയ്തതിന് കാരണം നീറ്റ്-യു.ജി ഫലങ്ങളല്ലെന്നും സി.ബി.ഐ അന്വേഷണത്തിനായി വൈകാരിക വാദങ്ങൾ ഹരജിക്കാർ ഉന്നയിക്കരുതെന്നും സുപ്രീംകോടതി ചൂണ്ടിക്കാട്ടി.കേന്ദ്രസർക്കാരും എൻടിഎയും വിദ്യാർത്ഥികളെ ഇരുട്ടിൽ നിർത്തുന്നുവെന്ന് ആരോപിച്ചാണ് ശാസ്ത്രീ ഭവനിൽ വിദ്യാർത്ഥികൾ പ്രതിഷേധിച്ചത് .മന്ത്രി ധർമ്മേന്ദ്രപ്രധാനെ കണ്ട വിദ്യാർഥികൾ നിവേദനം കൈമാറി. വിദ്യാർഥികളുടെ താൽപര്യങ്ങൾ സംരക്ഷിക്കാൻ കേന്ദ്ര സർക്കാർ പ്രതിജ്ഞബധമാണെന്ന് മന്ത്രി പറഞ്ഞു
കോടതി സ്റ്റേ ചെയ്യാൻ വിസമ്മതിച്ചതോടെ നീറ്റ് കൗൺസിലിംഗ് ഉടൻ ആരംഭിക്കും.അതേസമയം 580 മാർക്കിൽ കൂടുതൽ നേടിയ വിദ്യാർത്ഥികളുടെ പരീക്ഷാ കേന്ദ്രങ്ങളുടെ വിവരങ്ങൾ പുറത്തുവിടണമെന്ന് കോൺഗ്രസ് ആവശ്യപ്പെട്ടു.പരീക്ഷാ കേന്ദ്രങ്ങളുടെ വീഡിയോ റെക്കോർഡിംഗും പുറത്തുവിടണമെന്നാണ് ആവശ്യം
