പട്‌ന: ബീഹാറില്‍ തന്നെ കടിച്ച പാമ്പിനെ യുവാവ് തിരികെ കടിച്ച് കൊന്നിരിക്കുന്നുവെന്ന വാര്‍ത്ത സോഷ്യല്‍ മീഡിയകളില്‍ ഉള്‍പ്പെടെ പ്രചരിക്കുകയാണ്. ഒരു തവണ കടിച്ച പാമ്പിനെ തിരികെ രണ്ട് തവണയാണ് യുവാവ് കടിച്ചത്. യുവാവിന്റെ കടിയേറ്റ പാമ്പ് ചത്തെങ്കിലും പാമ്പ് കടിയേറ്റ യുവാവ് രക്ഷപ്പെട്ടു.
ബിഹാറിലെ രജൌലി മേഖലയില്‍ റെയില്‍വേ പാളങ്ങള്‍ ഇടുന്ന ജോലിക്കിടെയാണ് റെയില്‍വേ ജീവനക്കാരനായ സന്തോഷ് ലോഹാറിനെ പാമ്പ് കടിച്ചത്. വനമേഖലയാണ് ഈ ഭാഗം. ചൊവ്വാഴ്ച രാത്രിയോടെയാണ് ഇയാളെ പാമ്പ് കടിച്ചത്. കടിയേറ്റ ഉടനെ ഇയാള്‍ പാമ്പിനെ തിരികെ കടിക്കുകയായിരുന്നു. പ്രാദേശികമായി പാമ്പിനെ തിരികെ കടിച്ചാല്‍ വിഷമേല്‍ക്കില്ലെന്ന വിശ്വാസത്തിലാണ് തിരികെ കടിച്ചതെന്നാണ് യുവാവ് പ്രാദേശിക മാധ്യമങ്ങളോട് പ്രതികരിക്കുന്നത്. സഹപ്രവര്‍ത്തകര്‍ ഇയാളെ കൃത്യ സമയത്ത് ആശുപത്രിയിലെത്തിച്ചതോടെ 35കാരന്‍ രക്ഷപ്പെടുകയായിരുന്നു.
