മുംബൈ. നവദമ്പതികളായ അനന്ത് അംബാനിക്കും രാധിക മെർച്ചെൻ്റിനും അനുഗ്രഹാശംസകളുമായി പ്രധാനമന്ത്രി നരേന്ദ്ര മോദി നേരിട്ട് എത്തി. മുംബൈ ജിയോ വേൾഡ് കൺവെൻഷൻ സെൻ്ററിലെ ‘ശുഭ് ആശിർവാദ്’ പരിപാടിയിലാണ് മോദി എത്തിയത്. ഇന്നത്തെ ‘മംഗൽ ഉത്സവ്’ പരിപാടിയോടെ ആറുമാസം നീണ്ട കല്യാണ ആഘോഷങ്ങൾക്ക് സമാപനമാകും
വിവാഹ ദിവസം മുംബൈയിലേക്ക് എത്താൻ കഴിയാതിരുന്ന മോദി വധൂവരന്മാരെ ആശിർവാദിക്കാനായി ഇന്നലെ മുംബൈയിലെത്തി. വൈകിട്ടത്തെ പൊതു പരിപാടികൾ അവസാനിച്ച ശേഷം മുംബൈ ബികെസിയിലെ കൺവെൻഷൻ സെന്ററിലേക്ക് മോദിയെത്തി. മുകേഷ് അംബാനി പ്രധാനമന്ത്രിയെ വേദിയിലേക്ക് ആനയിച്ചു.
വിവാഹ സൽക്കാര ചടങ്ങിലും മോദി പങ്കെടുത്തു. വിവാഹത്തിനെത്തിയ സെലിബ്രിറ്റികളും ബോളിവുഡ് സൂപ്പർ താരങ്ങളും രാഷ്ട്രീയ നേതാക്കളും ഇന്നലത്തെ ചടങ്ങിൻ്റെയും ഭാഗമായി. മുൻ രാഷ്ട്രപതി റാംനാഥ് കോവിന്ദ്, ആന്ധ്ര മുഖ്യമന്ത്രി ചന്ദ്രബാബു നായ്ക്കു തുടങ്ങിയ രാഷ്ട്രീയ നേതാക്കളും ചടങ്ങിൽ പങ്കെടുത്തു. ഇന്നത്തെ മംഗൾ ഉത്സവ് ചടങ്ങിലേക്കും വിവിഐപികളുടെ നീണ്ട നിരയുണ്ടാവും. 5000 കോടിയിലേറെ രൂപ ചെലവിട്ടാണ് മുകേഷ് അംബാനി ഇളയ മകൻ ആനന്ദിന്റെ വിവാഹം നടത്തിയത്.
