ലഖ്നൗ. അമേഠിയിൽ അധ്യാപകനടക്കം നാലുപേരെ കൊലപ്പെടുത്തിയ സംഭവത്തിൽ മുഖ്യപ്രതി ചന്ദൻ വർമ്മയ്ക്ക് വെടിയേറ്റു.അറസ്റ്റിൽ നിന്ന് രക്ഷപ്പെടാൻ ശ്രമിക്കുന്നതിനിടയിലാണ് ചന്ദൻ വർമ്മയെ പോലീസ് വെടിവച്ച് കീഴ്‌പ്പെടുത്തിയത്.പ്രതി കൊലയക്ക് ഉപയോഗിച്ച് തോക്കും പോലീസ് കണ്ടെടുത്തു
അധ്യാപകനായ സുനിൽ, ഭാര്യ പൂനം, ആറും ഒന്നും വയസ് പ്രായമുള്ള കുട്ടികൾ എന്നിവരെ കൊലപ്പെടുത്തിയതിന് പിന്നാലെ ഡൽഹിയിലേക്ക് രക്ഷപ്പെടാൻ ശ്രമിച്ച ചന്ദൻ വർമ്മയെ നോയിഡയിൽ വച്ചാണ് പിടിക്കൂടിയത്.പിടികൂടിയ ചന്ദൻ വർമ്മയെ സംഭവസ്ഥലത്തേക്ക് കൊണ്ടുപോകുന്നതിനിടെയാണ് പോലീസിന്റെ കൈവശമുള്ള തോക്ക് തട്ടിയെടുത്ത് ആക്രമിക്കാൻ ശ്രമിച്ചത്. സ്വയരക്ഷാർത്ഥമാണ് പ്രതിയുടെ വലതുകാലിന് വെടിവെച്ചതെന്ന് പോലീസ് വ്യക്തമാക്കി.ആശുപത്രിയിൽ പ്രവേശിപ്പിച്ച ചന്ദൻ വർമ്മ അപകടനില തരണം ചെയ്തു.
കൊലപാതകത്തിനായി ഉപയോഗിച്ച തോക്കും രക്ഷപ്പെടാൻ ശ്രമിച്ച ബൈക്കും പോലീസ് കണ്ടെടുത്തു.
അതേസമയം കൊല്ലപ്പെട്ട പൂനവുമായി ചന്ദൻ വർമ്മയ്ക്ക് ഒന്നരവർഷത്തെ ബന്ധമുണ്ടായിരുന്നു.ഈ ബന്ധം വഷളായതിനെ തുടർന്നാണ് കൊലപാതകം എന്നാണ് പോലീസ് പങ്കുവെക്കുന്ന വിവരം.കുടുംബത്തിലെ നാലുപേരും കൊലപ്പെടുത്തി ആത്മഹത്യ ചെയ്യാനായിരുന്നു ചന്ദൻ വർമ്മയുടെ നീക്കം.ഇത് വ്യക്തമാക്കുന്ന വാട്സ്ആപ്പ് സ്റ്റാറ്റസ് പോലീസ് ശേഖരിച്ചിട്ടുണ്ട്.പ്രതിയെ വിശദമായി ചോദ്യം ചെയ്യാൻ ഒരുങ്ങുകയാണ് പോലീസ്’
