ചെന്നൈ: തമിഴ് രാജാക്കന്മാരുടെ അന്തപ്പുരങ്ങളില്‍ പരിചാരകരായി എത്തിയവരുടെ പിന്‍തലമുറക്കാരാണ് തെലുങ്കര്‍ എന്ന നടി കസ്തൂരിയുടെ അപകീര്‍ത്തി പരാമര്‍ശത്തില്‍ വിവാദം ശക്തമാകുന്നു. സംഭവത്തില്‍ പോലീസ് കേസെടുത്തതിന്് പിന്നാലെ നടി കസ്തൂരി ഒളിവില്‍ പോയി. താരത്തിന്റെ വീട് പൂട്ടിയ നിലയിലാണ്. മൊബൈല്‍ ഫോണ്‍ സ്വിച്ച് ഓഫ് ചെയ്തിരിക്കുകയാണ്. സോഷ്യല്‍ മീഡിയയിലും താരം ആക്റ്റീവ് അല്ല എന്നാണ് റിപ്പോര്‍ട്ടുകള്‍.
ചോദ്യം ചെയ്യലിനു ഹാജരാകണമെന്ന സമന്‍സ് നല്‍കാന്‍ പൊലീസ് എത്തിയപ്പോഴാണ് വീട് പൂട്ടി കടന്നു കളഞ്ഞ വിവരം അറിയുന്നത്. ഹിന്ദു മക്കള്‍ കക്ഷിയുടെ പ്രകടനത്തെ അഭിസംബോധന ചെയ്തുള്ള കസ്തൂരിയുടെ പ്രസംഗമാണ് വൈറലായത്. സംസ്ഥാനത്തിന്റെ വിവിധ ഭാഗങ്ങളില്‍ ബിജെപി അനുഭാവിയായ നടിക്കെതിരെ കേസ് രജിസ്റ്റര്‍ ചെയ്തിട്ടുണ്ട്. ഇതിന്റെ അടിസ്ഥാനത്തിലാണ് താരത്തെ ചോദ്യം ചെയ്യാന്‍ വിളിപ്പിച്ചുകൊണ്ട് സമന്‍സ് അയച്ചത്. സോഷ്യല്‍ മീഡിയയില്‍ വളരെ ആക്റ്റീവായ താരം നവംബര്‍ എട്ടിനാണ് അവസാന ട്വീറ്റ് പങ്കുവച്ചത്.
