മഹാബലിപുരം. തമിഴ്നാട്ടിൽ റോഡരികിൽ വിശ്രമിക്കവേ കാർ പാഞ്ഞുകയറി അഞ്ച് സ്ത്രീകൾ മരിച്ചു. തമിഴ്നാട് ചെങ്കൽപെട്ടിലെ മഹാബലിപുരത്താണ് സംഭവം. മദ്യലഹരിയിൽ കാർ ഓടിച്ചിരുന്ന യുവാവിനെയും സുഹൃത്തിനെയും പൊലീസ് പിടികൂടി.
ഇന്ന് വൈകിട്ടോടെ മഹാബലിപുരത്തെ ഒഎംആർ റോഡിലായിരുന്നു സംഭവം. പശുക്കളെയും ആടുകളേയും മേയ്ക്കുന്ന അഞ്ച് സ്ത്രീകൾ റോഡിന് സമീപത്ത് വിശ്രമിക്കുകയായിരുന്നു. ഇതിനിടയിലാണ് അമിതവേഗത്തിൽ നിയന്ത്രണം വിട്ടുവന്നകാർ ഇവരുടെ ശരീരത്തിലൂടെ പാഞ്ഞെുകയറിയത്. പണ്ടിതമേട് സ്വദേശികളായ വിജയ, യശോദ, കാത്തായി, ഗൗരി, ആനന്ദമ്മാൾ എന്നിവർ സംഭവസ്ഥലത്ത് വച്ച് തന്നെ മരിച്ചു.
സമീപത്തെ കോളേജിൽ പഠിക്കുന്ന നാല് വിദ്യാർഥികളായിരുന്നു കാറിലുണ്ടായിരുന്നത്. കാർ ഓടിച്ചിരുന്ന ജോഷുവ എന്ന 19 കാരനേയും ഇയാളുടെ സുഹൃത്തിനേയും നാട്ടുകാർ തടഞ്ഞുവെച്ച് തിരുപ്പോറൂർ പൊലീസിന് കൈമാറി. മറ്റു രണ്ടുപേർ ഓടി രക്ഷപെട്ടു. പ്രതികളെ നാട്ടുകാർ ചേർന്ന് മർദിക്കാർ ശ്രമിച്ചു. ചെങ്കൽപെട്ട് എസ്പി സ്ഥലത്തെത്തി. പ്രതികളെ വൈദ്യപരിശോധനയ്ക്ക് ശേഷം തിരുപ്പോറൂർ പൊലീസ് സ്റ്റേഷനിൽ എത്തിച്ചിട്ടുണ്ട്. രക്ഷപെട്ടുപോയ രണ്ടുപേർക്കായി തെരച്ചിൽ ആരംഭിച്ചു
