ചെന്നൈയിലെ അണ്ണാ യൂണിവേഴ്സിറ്റിയിൽ വിദ്യാർത്ഥിനിയെ പീഡിപ്പിച്ചതായി പരാതി.
ക്യാമ്പസിനുള്ളിൽ വച്ച് അജ്ഞാതരായ രണ്ടുപേർ പീഡിപ്പിച്ച ശേഷം ദൃശ്യങ്ങൾ പകർത്തി എന്നാണ് വിദ്യാർത്ഥിനി പരാതി നൽകിയിരിക്കുന്നത്. സംഭവത്തിൽ കേസെടുത്ത പൊലീസ് ഒരാളെ കസ്റ്റഡിയിൽ എടുത്തു. ക്യാമ്പസിലേക്ക് എസ്എഫ്ഐ പ്രതിഷേധം നടത്തി.
രണ്ടുദിവസം മുൻപ് രാത്രി സുഹൃത്തുമായി ക്യാമ്പസിൽ സംസാരിച്ചുകൊണ്ടിരിക്കുമ്പോൾ പീഡനത്തിനിരയായെന്നാണ് കന്യാകുമാരി സ്വദേശിയായ പെൺകുട്ടി പരാതി നൽകിയിരിക്കുന്നത് . അജ്ഞാതരായ രണ്ടുപേർ എത്തി സുഹൃത്തിനെ മർദ്ദിച്ചു, ശേഷം തന്നെ പീഡിപ്പിച്ചു. ഇവർ രണ്ടുപേരും മുഖംമൂടി വച്ചതിനാൽ തനിക്ക് ആളെ തിരിച്ചറിയാൻ ബുദ്ധിമുട്ടുണ്ടെന്നും പെൺകുട്ടി പറയുന്നു. പരാതിയിൽ കേസെടുത്ത കോട്ടൂർപുരം പൊലീസ് ഒരാളെ കസ്റ്റഡിയിലെടുത്തു. പെൺകുട്ടിയുടെ സുഹൃത്തടക്കം 20ലധികം പേരെയാണ് ഇന്ന് ചോദ്യം ചെയ്തത്. സംഭവം നടന്ന സ്ഥലത്തെ സിസിടിവി പ്രവർത്തനരഹിതമാണ്. ക്യാമ്പസിന് ഉള്ളിലുള്ള ആരെങ്കിലുമാകാം കൃത്യത്തിന് പൊന്നിലെന്നാണ് പൊലീസ് നിഗമനം. മൂന്ന് പ്രത്യേകസംഘങ്ങൾ ആയി കേസ് അന്വേഷിക്കും. കേസിലെ പ്രതികളെ ഉടൻ അറസ്റ്റ് ചെയ്യണമെന്ന് ആവശ്യപ്പെട്ട് എസ്എഫ്ഐ ക്യാമ്പസിന് മുന്നിൽ പ്രതിഷേധം നടത്തി
ക്യാമ്പസിന് പോലീസ് സുരക്ഷ ഏർപ്പെടുത്തിയിട്ടുണ്ട്.
