ന്യൂഡൽഹി:ബിരുദ കോഴ്‌സുകളിലേക്കുള്ള പ്രവേശനത്തിനായുള്ള കോമൺ യൂണിവേഴ്‌സിറ്റി എൻട്രൻസ് ടെസ്റ്റ് (CUET) ബോർഡ് പരീക്ഷകളെ അപ്രസക്തമാക്കുകയോ കോച്ചിംഗ് സംസ്‌കാരത്തെ പ്രോത്സാഹിപ്പിക്കുകയോ ചെയ്യില്ലെന്നും സംസ്ഥാന ബോർഡുകളിലെ വിദ്യാർഥികൾക്ക് ഒരു ദോഷവും വരില്ലെന്നും യൂണിവേഴ്‌സിറ്റി ഗ്രാന്റ്സ് കമ്മീഷൻ (UGC) ചെയർമാൻ ജഗദേഷ് കുമാർ പറഞ്ഞു.
പരീക്ഷാ നടത്തിപ്പിന്റെ ചുമതലയുള്ള നാഷനൽ ടെസ്റ്റിംഗ് ഏജൻസി (NTA) അടുത്ത സെഷൻ മുതൽ വർഷത്തിൽ രണ്ടുതവണ സിയുഇടി നടത്തുന്നത് പരിഗണിക്കുമെന്നും അദ്ദേഹം അറിയിച്ചു.
പൊതുപ്രവേശന പരീക്ഷയിലെ സ്കോറുകൾ ബിരുദ പ്രവേശനത്തിന് ഉപയോഗിക്കാൻ താൽപര്യമുണ്ടെന്ന് നിരവധി പ്രമുഖ സ്വകാര്യ സർവകലാശാലകൾ സൂചിപ്പിച്ചതിനാൽ സിയുഇടി കേന്ദ്ര സർവകലാശാലകളിലെ പ്രവേശനത്തിൽ മാത്രം ഒതുങ്ങില്ലെന്നും ജഗദേഷ് കുമാറിനെ ഉദ്ധരിച്ച്‌ പിടിഐ റിപോർട് ചെയ്തു.
‘ടാറ്റാ ഇൻസ്റ്റിറ്റ്യൂട് ഓഫ് സോഷ്യൽ സയൻസസ് (TISS), ജാമിയ ഹംദാർദ് എന്നിവയുൾപെടെ എട്ട് ഡീംഡ് യൂണിവേഴ്‌സിറ്റികളും വിദ്യാർഥികളെ ബിരുദ കോഴ്‌സിലേക്ക് പ്രവേശിപ്പിക്കുന്നതിന് സിയുഇടി സ്കോറുകൾ ഉപയോഗിക്കാൻ ആഗ്രഹം പ്രകടിപ്പിച്ചിട്ടുണ്ട്. യുജിസിയിൽ നിന്ന് മെയിന്റനൻസ് ഗ്രാന്റുകൾ സ്വീകരിക്കുന്ന ഈ എട്ട് സ്ഥാപനങ്ങളുടെ വൈസ് ചാൻസലർമാരുമായും ഡയറക്ടർമാരുമായും ഞാൻ കഴിഞ്ഞ ദിവസം ഒരു മീറ്റിംഗ് നടത്തി’, കുമാർ പറഞ്ഞു. എന്നിരുന്നാലും, സിയുഇടി സ്വീകരിക്കാൻ താൽപര്യം പ്രകടിപ്പിച്ച സ്വകാര്യ സർവകലാശാലകളുടെ പേര് അദ്ദേഹം വെളിപ്പെടുത്തിയില്ല.
45 കേന്ദ്രസർവകലാശാലകളിലേക്കുള്ള പ്രവേശനത്തിന് 12-ാം ക്ലാസ് സ്‌കോറുകളല്ല, സിയുഇടി സ്കോറുകൾ നിർബന്ധമാണെന്നും കേന്ദ്രസർവകലാശാലകൾക്ക് അവരുടെ മിനിമം യോഗ്യതാ മാനദണ്ഡം നിശ്ചയിക്കാമെന്നും കുമാർ കഴിഞ്ഞ ആഴ്ച പ്രഖ്യാപിച്ചിരുന്നു.
ബിരുദ പ്രവേശനത്തിനുള്ള ഒരു കോച്ചിംഗ് സംസ്കാരത്തിലേക്ക് പരീക്ഷ നയിക്കുമോ എന്ന ചോദ്യത്തിന്, കുമാർ പറഞ്ഞു, ‘പരീക്ഷയ്ക്ക് ഒരു കോച്ചിംഗും ആവശ്യമില്ല. പരീക്ഷ പൂർണമായും 12-ാം ക്ലാസ് സിലബസ് അടിസ്ഥാനമാക്കിയുള്ളതായിരിക്കും. 11-ാം ക്ലാസ് സിലബസിൽ നിന്നുള്ള ചോദ്യങ്ങളും പരീക്ഷയ്ക്ക് ഉണ്ടാകുമോ എന്ന ആശങ്കയിലാണ് നിരവധി വിദ്യാർഥികൾ. ഉത്തരം വ്യക്തമല്ലേ?’, അദ്ദേഹം ചോദിച്ചു.
‘സംസ്ഥാന ബോർഡ് വിദ്യാർഥികൾക്ക് ഒരു ദോഷവും ഉണ്ടാകില്ല, കൂടാതെ പരീക്ഷ എല്ലാ ബോർഡുകളിലെയും വിദ്യാർഥികൾക്ക് തുല്യമായിരിക്കും. ഗ്രാമീണ പശ്ചാത്തലത്തിൽ നിന്നുള്ള വിദ്യാർഥികൾ പ്രാദേശിക ഭാഷകളിൽ പരീക്ഷ എഴുതുന്നു, വ്യത്യസ്ത സാമ്പത്തിക പശ്ചാത്തലങ്ങളിൽ നിന്നുള്ളവരും രാജ്യത്തുടനീളം ഭൂമിശാസ്ത്രപരമായി വിവിധയിടങ്ങളിൽ ഉള്ളവരും, എല്ലാവരേയും തുല്യമായി പരിഗണിക്കും’, കുമാർ വ്യക്തമാക്കി.
‘സർവകലാശാലകൾ ഇപ്പോഴും ബോർഡ് പരീക്ഷകൾ യോഗ്യതാ മാനദണ്ഡമായി ഉപയോഗിക്കും. ചില സർവകലാശാലകൾക്ക് ആവശ്യകത 60 ശതമാനമായി നിശ്ചയിക്കാം, ചിലർക്ക് 70 ശതമാനം, ആവശ്യാനുസരണം സജ്ജീകരിക്കാം, അതിനാൽ ബോർഡ് പരീക്ഷകൾ അപ്രസക്തമാക്കുന്നതിൽ ഒരു ചോദ്യവുമില്ല. എന്നിരുന്നാലും, 100 ശതമാനം മാർക്ക് നേടുന്നതിൽ ശ്രദ്ധ കേന്ദ്രീകരിക്കുന്നത് തീർച്ചയായും കുറയും, 98 ശതമാനം നേടിയിട്ടും ഒരു നല്ല കോളേജിൽ പ്രവേശനം ലഭിക്കാത്ത വിദ്യാർഥികളുടെ അവസ്ഥകൾ തീർച്ചയായും കുറയും’, അദ്ദേഹം പറഞ്ഞു.
കേന്ദ്ര സർവകലാശാലകളിലെ ബിരുദ കോഴ്‌സുകൾക്കുള്ള സിയുഇടിനുള്ള അപേക്ഷാ പ്രക്രിയ ഏപ്രിൽ രണ്ട് മുതൽ ആരംഭിക്കും.രാജ്യത്തുടനീളമുള്ള ഏത് കേന്ദ്ര സർവകലാശാലയിലും പ്രവേശനം തേടുന്ന വിദ്യാർഥികൾക്ക് ഏകജാലക അവസരം നൽകും. കമ്പ്യൂടർ അധിഷ്ഠിത ടെസ്റ്റ് (CBT) മോഡിലാണ് പരീക്ഷ നടത്തുക.
2020 ലെ പുതിയ ദേശീയ വിദ്യാഭ്യാസ നയത്തിൽ (NEP) യുജി പ്രവേശനത്തിനുള്ള ഒരു പൊതു പ്രവേശന പരീക്ഷ നിർദേശിക്കപ്പെട്ടിരിക്കുന്നു. എന്നിരുന്നാലും, ഈ ആശയം പൂർണ്ണമായും പുതിയതല്ല. 2012-ൽ, വിദ്യാഭ്യാസ മന്ത്രാലയത്തിന് കീഴിലുള്ള എല്ലാ കേന്ദ്ര സർവകലാശാലകളിലേക്കും ഇത് വ്യാപിപ്പിക്കാൻ സർക്കാർ ശ്രമിച്ചെങ്കിലും പ്രവേശനം നേടിയ വിദ്യാർത്ഥികളുടെ ഗുണനിലവാരത്തിൽ ഇത് ചെലുത്തുന്ന ആഘാതത്തെക്കുറിച്ച്‌ ആശങ്ക പ്രകടിപ്പിച്ച്‌ ചില സ്ഥാപിത സർവകലാശാലകൾ ഈ നിർദ്ദേശം സ്വീകരിച്ചില്ല. കാലക്രമേണ, പുതുതായി സജ്ജീകരിച്ച കൂടുതൽ കേന്ദ്ര സർവകലാശാലകൾ പൊതു പ്രവേശനം സ്വീകരിച്ചെങ്കിലും പഴയവ വിട്ടുനിന്നു.
