ട്വന്റി 20 ലോകകപ്പ് ജേതാക്കളായ ഇന്ത്യന്‍ ടീം പ്രത്യേക എയര്‍ ഇന്ത്യ വിമാനത്തില്‍ നാട്ടിലേക്ക് തിരിച്ചു. വിജയത്തിന് പിന്നാലെ ഇന്ത്യയിലേക്ക് മടങ്ങാനിരുന്ന ടീം ബെറില്‍ ചുഴലിക്കാറ്റിനെ തുടര്‍ന്ന് ബാര്‍ബഡോസില്‍ കുടുങ്ങിപ്പോയിരുന്നു. ടി20 ലോക ചാമ്പ്യന്‍മാരായ ഇന്ത്യന്‍ ടീമിനെ ബിസിസിഐ പ്രത്യേക വിമാനം ഏര്‍പ്പെടുത്തിയാണ് തിരികെ എത്തിക്കുന്നത്. ബിസിസിഐ സ്റ്റാഫ് അംഗങ്ങളും ടീമിനൊപ്പമുണ്ട്.
ജൂണ്‍ 30നും ജൂലൈ ഒന്നിനും മടങ്ങിവരാന്‍ കഴിയുമെന്ന് നേരത്തെ കരുതിയിരുന്നുവെങ്കിലും കാലാവസ്ഥ പ്രതികൂലമായതിനെ തുടര്‍ന്ന് ടീം അംഗങ്ങള്‍ ഹോട്ടലുകളില്‍ തന്നെ കഴിയുകയായിരുന്നു. ചുഴലിക്കാറ്റ് ദുര്‍ബലമാവുകയും കാലാവസ്ഥ തെളിയുകയും ചെയ്തതോടെ താരങ്ങള്‍ക്ക് നാട്ടിലേക്ക് തിരിക്കുകയായിരുന്നു. എയര്‍ ഇന്ത്യയുടെ പ്രത്യേക വിമാനം ബാര്‍ബഡോസില്‍ നിന്നും യാത്ര പുറപ്പെട്ടിട്ടുണ്ട്.
വ്യാഴാഴ്ച പുലര്‍ച്ചെ ആറുമണിയോടെ ടീമംഗങ്ങള്‍ ഡല്‍ഹിയില്‍ എത്തിച്ചേരും. താരങ്ങളെ സ്വീകരിക്കാന്‍ പ്രധാനമന്ത്രി വിമാനത്താവളത്തില്‍ എത്തിച്ചേരുമെന്നാണ് പ്രതീക്ഷിക്കുന്നത്. പ്രധാനമന്ത്രി നരേന്ദ്രമോദിയുമായുള്ള സന്ദര്‍ശന ശേഷം മുംബൈയില്‍ ഗംഭീരമായ റോഡ് ഷോ നടക്കും. ടി 20 ലോക കിരീടവുമായി എത്തുന്ന ടീമംഗങ്ങളെ വരവേല്‍ക്കാന്‍ കാത്തിരിക്കുകയാണ് ആരാധകര്‍.
