ഓസ്‌ട്രേലിയയ്‌ക്കെതിരായ പെര്‍ത്തില്‍ നടക്കുന്ന ഒന്നാം ക്രിക്കറ്റ് ടെസ്റ്റില്‍ ഇന്ത്യ ശക്തമായി തിരിച്ചുവരുന്നു. രണ്ടാമിന്നിങ്‌സില്‍ ഓപ്പണര്‍മാരായ യശസ്വി ജയ്‌സ്വാളിന്റെയും കെ.എല്‍.രാഹുലിന്റെയും കരുത്തില്‍ ഇന്ത്യ കുതിക്കുകയാണ്. രണ്ടാംദിനം കളിയവസാനിക്കുമ്പോള്‍ വിക്കറ്റൊന്നും നഷ്ടപ്പെടാതെ ഇന്ത്യ രണ്ടാമിന്നിങ്‌സില്‍ 172 റണ്‍സ് അടിച്ചെടുത്തിട്ടുണ്ട്. ജയ്‌സ്വാള്‍ 90 റണ്‍സുമായും രാഹുല്‍ 62 റണ്‍സുമായും ക്രീസിലുണ്ട്. ഇന്ത്യക്ക് 218 റണ്‍സിന്റെ ലീഡ് ഉണ്ട്. ഒന്നരദിവസം കൊണ്ട് 20 വിക്കറ്റ് വീണ പിച്ചില്‍ കരുതലോടെയാണ് ഇരുവരും ബാറ്റ് ചെയ്യുന്നത്. 19 ഓവറില്‍ 9 റണ്‍സ് മാത്രം വഴങ്ങിയ ജോഷ് ഹേസല്‍വുഡാണ് ആസ്‌ട്രേലിയന്‍ നിരയില്‍ ഭേദപ്പെട്ട രീതിയില്‍ ബോള്‍ ചെയ്യുന്നത്.
നേരത്തേ ഓസ്‌ട്രേലിയയുടെ ഒന്നാമിന്നിങ്‌സ് ഇന്ത്യ വെറും 104 റണ്‍സില്‍ അവസാനിപ്പിച്ചു. 46 റണ്‍സിന്റെ ഒന്നാമിന്നിങ്‌സ് ലീഡ്. ഇന്ത്യ ആദ്യ ഇന്നിങ്‌സില്‍ 150 റണ്‍സാണ് നേടിയത്. ക്യാപ്റ്റന്‍ ജസ്പ്രീത് ബുംറയുടെയും ഹര്‍ഷിത് റാണയുടെയും തീപാറുന്ന ബോളിങ്ങാണ് ഓസ്‌ട്രേലിയയെ കശക്കിയെറിയാന്‍ ഇന്ത്യയ്ക്ക് കരുത്തായത്. 26 റണ്‍സ് നേടിയ മിച്ചല്‍ സ്റ്റാര്‍ക്കിനും 21 റണ്‍സെടുത്ത അലക്‌സ് കാരിയും ഒഴികെ ആര്‍ക്കും കാര്യമായി ഒന്നും ചെയ്യാനായില്ല. ബുംറ അഞ്ചും റാണ മൂന്നും മുഹമ്മദ് സിറാജ് രണ്ടും വിക്കറ്റ് വീഴ്ത്തി.
