കറാച്ചി: ലാഹോർ ടെസ്റ്റ് പരമ്പരയുടെ അവസാന ദിനം അവസാന സെക്ഷനിൽ പാക്കിസ്ഥാനെ 115 റൺസിന് തോൽപ്പിച്ച്‌ ഓസ്ട്രേലിയ പരമ്പര സ്വന്തമാക്കി.മൂന്ന് മത്സര പരമ്പര 1-0 എന്ന നിലയിലാണ് ഓസീസ് നേടിയത്.
ആദ്യ രണ്ടു മത്സരവും സമനിലയിൽ കലാശിച്ചിരുന്നു.
351 റൺസ് വിജയലക്ഷ്യം പിന്തുടർന്ന പാക്കിസ്ഥാൻ 235 റൺസിന് ഓൾഔട്ടായി. അഞ്ച് വിക്കറ്റെടുത്ത നഥാൻ ലയണും മൂന്ന് വിക്കറ്റുകൾ നേടിയ ക്യാപ്റ്റൻ പാറ്റ് കമ്മിൻസുമാണ് ഓസീസിന് വിജയം സമ്മാനിച്ചത്. ഇമാം ഉൾ ഹഖ് (70), ബാബർ അസം (55) എന്നിവരാണ് പാക്ക് നിരയിൽ പൊരുതിയത്.
വിക്കറ്റ് പോകാതെ 73 എന്ന നിലയിലാണ് പാക്കിസ്ഥാൻ അഞ്ചാം ദിനം തുടങ്ങിയത്. ഉച്ചഭക്ഷണത്തിന് പിരിയുമ്പോൾ സ്കോർ 136/2 ആയിരുന്നു. എന്നാൽ രണ്ടാം സെക്ഷനിൽ ആതിഥേയർക്ക് മൂന്ന് വിക്കറ്റുകൾ നഷ്ടമായി.
അസ്ഹർ അലി (17), ഫവാദ് ആലം (11), മുഹമ്മദ് റിസ്വാൻ (0) എന്നിവർ പൊരുതാതെ കീഴടങ്ങിയതോടെ പാക്കിസ്ഥാൻ പരാജയത്തിലേക്ക് വീഴുകയായിരുന്നു.പരമ്പരയിൽ 496 റൺസ് സ്കോർ ചെയ്ത ഓസീസ് ഓപ്പണർ ഉസ്മാൻ കവാജ മാൻ ഓഫ് ദ സീരിസ് പുരസ്കാരം നേടി. മത്സരത്തിൽ എട്ട് വിക്കറ്റുകൾ നേടിയ പാറ്റ് കമ്മിൻസാണ് മത്സരത്തിലെ താരം.
