കോപ്പ അമേരിക്കയിൽ അർജന്റീനയുടെ വിജയാഘോഷത്തിന് പിന്നാലെ വംശവെറി നിറഞ്ഞ വിഡിയോ പോസ്റ്റ് ചെയ്ത് അര്‍ജന്റീനിയൻ താരം എന്‍സോ ഫെര്‍ണാണ്ടസ്. ഫ്രാന്‍സ് ടീമിലെ ആഫ്രിക്കന്‍ വംശജരായ താരങ്ങളെക്കുറിച്ചുള്ള വിഡിയോയാണ് എന്‍സോ ഫെര്‍ണാണ്ടസ് ഇന്‍സ്റ്റഗ്രാമില്‍ പോസ്റ്റ് ചെയ്തത്. താരത്തിന്റെ ക്ലബായ ചെല്‍സിയിലെ ഫ്രഞ്ച് താരങ്ങളടക്കം കടുത്ത പ്രതിഷേധവുമായി രംഗത്തെത്തി. സമൂഹമാധ്യമങ്ങളില്‍ എന്‍സോ ഫെര്‍ണാണ്ടസിനെ പിന്തുടരുന്നത് അവസാനിപ്പിച്ചു. ഇതോടെ പോസ്റ്റ് പിന്‍വലിച്ച് എന്‍സോ പരസ്യമായി മാപ്പുപറഞ്ഞു.
കൊളംബിയയ്‌ക്കെതിരായ അർജന്റീനയുടെ കോപ്പ വിജയത്തിന് പിന്നാലെയാണ് എന്‍സോ ഫെർണാണ്ടസും സഹതാരങ്ങളും ചേര്‍ന്ന് ഫ്രാൻസിന്‍റെ കളിക്കാരെ അപകീർത്തിപ്പെടുത്തുന്ന ഗാനം ആലപിക്കുന്ന വിഡിയോ പുറത്തുവന്നത്. ദൃശ്യങ്ങളില്‍ മറ്റൊരാള്‍ വിഡിയോ കട്ട് ചെയ്യാന്‍ പറയുന്നുണ്ടെങ്കിലും അതിന് മുന്‍പേ ഗാനത്തിന്‍റെ ആദ്യഭാഗങ്ങള്‍ റെക്കോര്‍ഡ് ചെയ്യപ്പെടുകയായിരുന്നു. ഫ്രാൻസും അർജന്‍റീനയും തമ്മിലെ 2022 ലെ ലോകകപ്പ് ഫൈനൽ സമയത്ത് ഉയര്‍ന്നുവന്ന വംശവെറിയും ട്രാന്‍സ്ഫോബിയയും നിറഞ്ഞ പാട്ടാണിത്.
